Balitang Tagalog sa Japan

Ang mga menor de edad ay hindi na makabibili ng sigarilyo mula sa mga vending machines dahil sa taspo IC cards.

Inilunsad na ng Tobacco Institute ng Japan ang sistema sa pagbeberipika ng edad sa Miyazaki at Kagoshima Prefecture nitong Marso, nauna sa pagpapatupad sa buong bansa nitong Hulyo.

Ang mga naninigarilyo ay kailangang gumamit ng kard kapag bibili sa mga machines, maliban na lang kung mayroong scanner ng kanilang driver's license.

95% NG MGA TAXI SA TOKYO NAGING SMOKE-FREE NA

 Nasa 95% ng mga taxi sa Tokyo, o 52,000 ng 55,000 taxi, ay ipinag-babawal na ang paninigarilyo.

 Ang organisasyon para sa corporate taxi na sumasaklaw sa 400 kumpanya na may 34,000 sasakyan sa Tokyo ang nagdesisyon noong nakaraang Agosto na maging smoke-free mula Enero 7 ng taong ito.

 Ang natitirang 5% ng mga taxi ay hindi inoobligang sumunod sa polisiya dahil nabibilang sila sa mga kumpanyang hindi kasapi ng asosasyon ng mga taxi firms na nagde-sisyong maging smoke-free.

 Plano ng Tokyo private taxi association na magpadala ng mga sulat sa lahat ng pribadong taxi drivers upang himukin silang makipagtu-lungan.

 Nagpadala din sila ng mga no smoking signs sa pakikipag-tulungan ng corporate taxi group pati na rin ang paglalagay ng smoke-free stickers sa loob ng mga taxi cab.

F35 MAAARI NANG I-DEPLOY SA KADENA AIR BASE

Download Full Image

Ayon sa US military sources maaari nilang ipadala ang kanilang next-generation jet fighter sa US Kadena Air Base sa Okinawa Japan. Kasalukuyang ginagawa ng Amerika kasama ang Britain ang F-35 fighter jets.

Ang mga jets ay gagamitin ng US Navy at Marines upang atakehin ang land targets at vessels.

Malaki rin ang posibilidad na ang F-35 jets ay ipapadala rin sa Iwakuni Air Station ng Marines sa Yamaguchi Prefecture, kanlurang Japan.

External links

• F-35 Lightning II - Wikipedia, EN
• F-35 - Wikipedia, JA

Download Full Image

Pansamantalang magtatalaga ang US Air Force ng 12 most advanced F-22 fighter jets sa US Kadena Air Base sa Okinawa sa susunod na buwan.

Ito ang kauna-unahang pagkakataon na magtatalaga ng mga F-22 fighters sa labas ng U.S., na kayang iwasan ang radar at makakaatake ng ground targets na may precision-guided bombs.

Nagsimula ang operasyon ng mga nasabing eroplano noong isang taon lamang.

Isang grupo ng 12 eroplano mula sa air base sa Virginia ang ipoposisyon sa Kadena sa loob ng ilang buwan mula Pebrero.

External links

• F-22 Raptor Team Web Site
• F-22 Raptor - Wikipedia, EN
• F-22 - Wikipedia, JA

LALAKING TAGA-YOKOHAMA NA NAKAGAT NG ASO SA PILIPINAS NAKAKUHA NG RABIES

Nasa seryosong kalagayan ngayon ang isang lalaking taga-Yokohama matapos makakuha ng rabies dahil sa kagat ng aso sa Pilipinas, ito’y ayon sa Ministry of Helath, Labor ang Welfare noong Miyerkules.

Ito na ang pangalawang kaso ng rabies na nadiskubre sa Japan sa loob lamang ng ilang araw. Wala pang napapaulat na kaso ng rabies sa Japan sa loob ng 36 taon.

Agad namang kumilos ang mga opisyal ng Health Ministry sa muling pagsulpot ng nasabing sakit sa pamamagitan ng paggawa ng mga posters na nagbababala hinggil sa panganib ng rabies. Palno ng ministry na ilagay ang posters sa mga lugar gaya ng paliparan at quarantine centers.

Ayon sa ministry ang pinakahuling kaso kung saan dawit ang isang lalaki na nasa edad 60 na nakatira sa Pilipinas at pansamantalang bumalik sa Yokohama ay nakagat sa kamay ng aso sa Pilipinas noong Agosto.

 ABDUCTION DOCUMENTARY IPINALABAS SA WASHINGTON D.C.

Pinanood ng mga opisyal ng gobyerno ng Amerika at miyembro ng kongreso ang isang prize-winning na dokumentaryo hinggil sa pagdukot ng North Korea ng Hapon na si Megumi Yokota bilang tanda ng pagbubukas ng pelikula sa kabisera ng U.S.

Ang pelikulang, Abduction: The Megumi Yokota Story ay nagpapakita sa 30 taong paghahanap ng mga magulang nito upang maibalik ang kanilang anak na babae.

Si Megumi ay dinukot noong 1977 sa edad na 13.  Sinabi ng North Korea na patay na ito ngunit hindi naniniwala ang Japan.

Sinabi ni Japanese Ambassador Ryozo Kato na umaasa siyang ang pag-papalabas sa Washington ay magpapalalim ng kaalaman ng mga miyembro ng gobyerno ng Amerika at kongreso hinggil sa isyu.

映画 『めぐみ－引き裂かれた家族の30年』 公式サイト

http://en.wikipedia.org/wiki/Abduction:_The_Megumi_Yokota_Story

http://www.youtube.com/watch?v=8oJL6_cu_Rg

HAPON KINAGAT NG ASO SA PINAS, NAGKA-RABIES

Isang lalaking Hapon ang nasa malubhang kalagayan pagkatapos nitong makagat ng isang asong may rabies sa Pilipinas.

Ito ang kauna-unahang insidenteng nangyari sa Japan mula noong 1970 nang magbabala ang Japan sa mga mamamayan nito na mag-ingat sa mga rehiyon kung saan ang sakit na ito ay laganap.

Ayon sa Japan health ministry, isang lalaking nasa edad 60, naninirahan sa Kyoto, kanluran ng Japan, ay nakagat ng aso sa Pilipinas noong huling bahagi ng Agosto.  Nakabalik na ang naturang lalaki sa Japan.

Nitong unang linggo ng buwan, sinabi ng lalaki na nakakaramdam siya ng mga sintomas kagaya ng dehydration at hallucinations, at natuklasan ng National Institute of Infectious Diseases ng Japan na siya ay may rabies. Ang naturang lalaki ay walang malay sa ngayon.

PLAYSTATION 3 MABIBILI NA SA JAPAN

Nagsimula nang ibenta ng Sony Computer Entertainment noong Sabado ang kanilang pinakahihintay na Playstation 3 sa Japan na pinilahan ng ilang oras ng libo-libong mamimili sa Tokyo.

Ilulunsad naman ang PS3 sa Amerika ngayong Biyernes at sa Europa sa Marso. Kabilang sa mga features ng PS3 ay ang mas magandang graphics at tunog, mayroon din itong DVD player kung saan pwedeng manood ng pelikula, built-in bluetooth at wi-fi internet capability.

Ang bagong console ay sold out sa pangunahing tindahan ng Bic Camera sa Chiyoda Ward nang magbukas ito ng ika-pito ng umaga matapos ang isang countdown. Mahigit 1,100 game enthusiats ang pumila sa nasabing tindahan mula nang alas kuwatro ng umaga 

http://www.us.playstation.com/PS3/default.html

http://www.jp.playstation.com/ps3/

BAGONG AYOS NA NARITA TERMINAL NAKATAKDANG MAGBUKAS

Halos isang libong bisita at mamamahayag ang naglibot sa bagong ayos na South Wing sa Narita International Airport Terminal 1 sa isang seremonya noong Lunes na isinagawa ng bago ang grand opening sa katapusan ng Linggo.

Sa bagong South Wing, ang pangunahing international gateway ng bansa ay magkakaroon ng pinakamalaking floor space sa lahat ng terminal sa Japan.

Sinabi sa mga manonood ni transport minister Kazuo Kitagawa a kanyang pambungad na pananalita, isa sa mga hamon na hinaharap ng Japan ay kung paano pananatilihin at palalakasin ang kanilang global competitiveness.

Sinabi naman ni Masahiko Kurono, presidente ng Narita International Airport Corp., na siyang airport operator, ipinagmamalaki nilang nagawa nila ang airport na isang maginhawang lugar para sa mga pasahero.

Ang grand reopening ng Wing ay sa Biyernes.

 

http://www.narita-airport.jp/en/

http://news.livedoor.com/webapp/journal/cid__2031422/detail?rd

Pinay na Ikinulong ng Immigration sa Japan, Pinalaya Na!

Pinalaya na ng pamahalaang hapon ang isang piany na inakusahan ng paglabag sa Japanese Immigration Law matapos ang matagumpay na apelang ginawa ni Philippine Foreign Affairs Secretary Alberto Romulo kay Japanese Justice Secretary Seiken Sugiura nang nagtungo ang una sa Japan kamakailan.

Ayon sa ulat ni philippine Ambassador to Tokyo Domingo Siazon, si Adelaida Bondoc Hashizume, isang Filipino national, na inakusahan ng paglabag sa Japanese Immigration Laws, ay pinalaya na mula sa Tokyo Immigration Detention Center at inisyuhan noong nakaraang Abril 5 ng Special Permit para manatili sa Japan.

Ayon pa kay Ambassador Siazon, ang pagkakapalaya kay Adelauda mula sa kulungan ang naging bunga ng matagumpay na pakikipagpulong ni Secretary Romulo kay Minister Sugiura, na nagbigay din nang pag-asa upang mapabilis ang pagpoproseso sa iba pang kasong pang-imigrasyon na sangkot ang ilang Pilipino.

Ang iba pang magkatulad na kaso ng dalawang Pinay ay itinawag-pansin din sa Japanese justice minister. Ang isa sa dalawa, si Cecilia de Lima Tajihara, na resulta ng imbestigasyon sa umano'y paglabag niya sa Japanese Immigration Laws. Ang isa pang Pinay, si Teresita Torres Murai, ay boluntaryong bumalik sa Pilipinas noonpang Abril 5.

Ayon kay Ambassador Siazon, ipinaliwanag ni Romulo na ang tatlong Pinay na inakusahan ng paglabag sa Japanese Immigration Laws ay kasal sa mga Japanese national at ang ilan sa kanila ay nagkaroon ng mga anak na Japanese citizens na.

Idinagdag pa umano ni Romulo na nai-file na nila o nakatakda na nilang i-file ang visa applications ng mga nabanggit na Pinay nang sila'y arestuhin dahil umano sa paglabag sa Japanese Immigretion Laws.

Ayon pa kay Ambassador Siazon, ipinagdiinan ni Secretary Romulo kay Minister Sugiura na maaaring hindi nasuring maigi ng Japanese Immigretion authorities ang kaso ng mga naturang Pinay na kasal naman sa mga Japanese nationals at mayroon ring mga anak na Japanese citizens na.

Sinabi rin ni Ambassador Siazon na tututukan ng embahada ang pag-monitor sa imbestigasyon sa kaso ni Tajihara, ganoon din ang iba pang magkakatulad na kaso sa immigration na sangkot ang mga Pinay sa Japan.

Umaasa rin si Ambassador Siazon, na tulad sa kaso ni Adelaida, magiging makatarungan ang pagpapatulad ng immigration rules.

 Mahigit sa ikatlo ng mga taong nawalan ng kamag-anak sa isang malagim na pagkabangga ng isang tren sa Amagasaki, Hyogo Prefecture noong nakaraang taon ay nagsabing mayroon pa rin silang psychological wounds makaraan ang isang taon ayon sa isang survey.

 Sa pamamagitan ng pakikipanayam at pagsagot sa mga questionnaire mula Marso hanggang Abril, tumugon ang 46 ng kamag-anak ng 43 na namatay.  Lumalabas na sangkapat sa mga tumugon ay nagpatulong sa mga doktor o counselors, habang ang iba naman ay nagpasuri para sa post-traumatic stress disorder.

 Noong ika-25 ng Abril 2005, isang nagmamadaling tren sa JR Fukuchiyama Line ang nabalaho sa isang palikong riles na may bilis na 100kph bago ito bumangga sa isang condominium complex na pumatay ng 106 pasahero kasama na ang driver ng tren na magmamadali upang maka-abot sa takdang oras.

 Nasa kalahati sa mga tumugon ay umaasang ang lahat ng mga alaala ng insidente ay unti-unting nang maglalaho, samantalang ang 2/3 naman ay nananawagan sa West Japan Railways Co. na gumawa ng hakbang upang di malimutan ng publiko ang pangyayari.

 Lagpas naman sa kalahati ang nag-uudyok sa JR West na linawin ang kanilang responsibilidad sa aksidente.

 Sa pinakamalaking pagkasiwalat ng datos ng pulisya, ilang files na mayroong personal na impormasyon ng 4,400 katao kabilang ang mga biktima ng krimen at mga suspek, ang naikalat sa internet.

 Ito ang sinabi ng Ehime prefectural police. Sinabi pa ng pulisya na ang virus-prone Winny software ang siya na namang salarin.

 Ang datos ay kinabibilangan ng mga pangalan at tirahan ng mga biktima, mga pinaghihinalaan at iba pang indibidwal.

 Idinagdag pa nila na hihingi sila ng paumanhin sa mga apektadong tao.

 Ayon sa ilang source ilan sa mga naisiwalat na datos ay mga sikretong larawan mula sa mga suspek na menor de edad gayon din ang mga testimonya ng mga testigo.

 Sinabi ng Ehime police na nitong katapusan ng linggo ay natukoy na nila ang karamihan sa mga naisiwalat na datos. Ilan sa mga impormasyon ay mula pa noong 1984.

 Ang files ay tila nakopya umano mula sa computer ng isang police inspector na nakabitan ng Winny file-sharing program.

 Tahimik ang mga opisyal sa usaping kung ang mga files ay naglalaman ng mga sensitibong impormasyon gaya ng mga pangalan ng impormante.

 Pinipilit ng Japan ang Iraq na kumpirmahin ang isang ulat na naaresto na ng pulisya ang pinaghihinalaang teroristang sangkot sa pandurukot at pamumugot ng ulo ng isang Japanese backpacker sa Baghdad noong 2004.

 Sinabi ng Iraqi Ministry of Internal Affairs sa pamahalaan ng Japan na iniimbestigahan nito ang pagiging totoo ng ulat ng isang lokal na istasyon ng telebisyon noong Pebrero 22 na isang suspek ang naaresto sa pagkakapatay sa 24 na taong gulang na Hapon na si Shosei Koda.

 Ayon sa Japanese Embassy sa Baghdad, sinabi ng internal ministry ng Iraq sa isang hindi opisyal na pahayag na nahuli na ang suspek.

 Batay sa mga ulat, ang suspek na si Hussein Fahmi, 26 na taong gulang, ay naaresto sa Baghdad noong unang bahagi ng Pebrero.

 Siya ay iniuugnay sa ilang terrorist attacks, kabilang ang pagpatay kay Koda.

 Siya rin ay miyembro ng militanteng grupong kaanib sa Jordanian terrorist na si Abu Musab al-Zarqawi.

 Si Koda ay naglalakbay mag-isa sa Baghdad noong Oktubre 2004 nang siya ay madukot.

 Isang video ang inilabas kung saan nakatakip ang ulo ng mga bumihag kay Koda at nanakot na papatayin siya kung hindi aalisin ng Japan ang kanilang tropa sa Iraq.

 Kalaunan, natagpuan ang pugot na katawan ni Koda sa isang kalye ng Baghdad.

2,700 KATAO, MAAARING MAMATAY SA LINDOL SA JAPAN TRENCH

 Itinaya ng isang panel ng pamahalaaan na binubuo ng mga seismologists naaabot sa 2,700 katao ang maaaring mamatay sakaling magkaroon ng lindolmula sa Pacific coast sa hilagang-silangang Japan at maaari itong makapagsimula ng isang tsunaming makakapinsala katulad ng pamiminsalangginawa ng 2004 Indian Ocean tsunami.

 Nakatuon ang pagtataya sa pinakamalalang maaaring mangyari sa Japan at Chishima trenches sa PacificOcean na umaabot mula sa Chiba Prefecture hanggang Hokkaido.

 Ibinase ngpanel, na nasa ilalim ng Central Disaster Management Council ng pamahalaan, ang kanilang pagtataya sa walong pangyayaring kinabibilangan ng iba't-ibanglokasyon, panahon, oras at bilis ng hangin.

 Itinatayang pinakamaramiang mamamatay kung ang Pacific Plate ay mapailalim sa North American Plateat magkakaroon ng pagyanig na may lakas na 8.6 magnitude sa tabing dagatng rehiyon ng Sanriku sa ganap na alas singko ng umaga sa panahon ngtaglamig.

 Ayon sa report ng panel, hindi magbubunga ng malawakang pagyanigang lindol sa naturang sitwasyon, ngunit maaari itong maging sanhi ng tsunami na aabot sa Pasipikong baybayin ng Japan sa loob lamang ng 30 minuto.

 Itinaya ng grupong aabot ang taas ng alon ng hanggang 22 metro pagdatingsa pampang.

 Pinakamarami umanong bilang ng pagkamatay ang 2,700, ngunitsinabi ng panel na ang tsunami ay makakapinsala rin ng may 9,400 na bahayat gusali at makakawasak ng buong fishing villages sa ilang lugar.

PAGKALAT NG SPYWARE SA JAPAN, PINANGANGAMBAHAN

 Naaalarma ang mga awtoridad sa Japan sa pagkalat ng spyware, isang software na palihim na kumukuha ng kontrol sa isang computer at nagdadala sa mga mahahalagang impormasyong laman nito sa mga magnanakaw.
 Ang spyware ay nakatago sa mga software, music files, screen-savers at kahit sa ordinaryong e-mail.
 Isa itong malaking problema para sa mga institusyon ng pananalapi, ngunit kahit ang mga mayayamang kumpanyang gaya nito ay walang ideya kung paano makakagawa ng mahigpit na depensa laban dito.
 Ayon sa isang opisyal ng Computer Associates International, Inc., manggagawa ng mga anti-spyware at anti-virus software, itinatayang may 160,000 klaseng spyware ang kumakalat ngayon sa Estados Unidos at nagdudulot ng mga seryosong problema.
 Gayunpaman, may mga programa umano sa Estados Unidos na ginawa upang matukoy at matanggal ang mga spyware.
 Dapat rin umanong magsagawa ng mga hakbang ang Japan upang malabanan ang spyware bago pa ito makapagdulot ng malaking pinsala. 
 Ang spyware ay nakatago sa loob ng laptops o desktops at nakadisenyo para magtala ng keystrokes, passwords o pagmamanman sa browsing habits. 
 Ayon sa mga opisyal ng Tokyo Metropolitan Police Department, ang bilang ng mga kaso ng spyware crime ay patuloy na tumataas simula noong tag-araw. 
 Karamihan sa mga kaso ay may kinalaman sa paglilipat ng pera mula sa bank account gamit ang computer.
 Ang mga bangko at anti-spyware organizations ay nagsusumikap upang pagbutihin ang kanilang seguridad at turuan ang mga gumagamit ng computer ukol sa panganib na dulot ng spyware.

BARYANG YARI SA GINTO AT PILAK NA MAY IMAHE NI HELLO KITTY, IBEBENTA

 Ayon sa coin importer na Taisei Coins Corp. at Sanrio Co., magbebenta sila ng tatlong baryang euro na mayroong larawan ni Hello Kitty simula Disyembre 5.
 Ang 1-ounce gold coin na may halagang 50 euros ay ipagbibili sa halagang 168,000 yen.
 Ang 10-euro quarter-ounce gold coin ay ibebenta sa 52,500 yen at ang 1.5-euro silver coin naman sa 8,400 yen.
 Makikita sa mga barya ang imahe ni Hello Kitty na masayang namumuhay sa Paris na nilikha ng Monnaie de Paris minting authority sa France.

PHILIPPINE DAY SA ACHI EXPO 2005, NAGING MATAGUMPAY

 Ipinagdiwang ang Philippine Day sa Aichi World Expo 2005 sa loob ng apat na araw mula Setyembre 19 hanggang 22.

 Ipinamalas sa pamamagitan ng mga kanta, sayaw at tugtugan ang mayaman, makulay at samu't-saring tradisyon ng Pilipinas.

 Nagkaroon ng gala performance noong Setyembre 20 sa Expo Dome na may kapasidad na 3000 katao.

 Ayon kay Tourism Secretary Joseph Ace H. Durano, na siyang namuno sa delegasyon ng Pilipinas sa Aichi, ang mga pagtatanghal na sinalihan ng may 160 talento mula sa buong Pilipinas ay sadyang ginawa para sa Expo buhat sa Cultural Center of the Philippines sa ng direksiyon ni Monino Duque.

 Kabilang sa mga nagpakitang gilas ang mga bokalistang sina Johnson Uy at Rachelle Gerodias, Ballet Philippines, Philippine Philharmonic Chamber Orchestra, Sining Kumintang ng Batangas, Streetboys, Tanghalang Pilipino, at Yag-yag Festival Dancers mula Negros Oriental.

 Bahagi ng delegasyon ng Pilipinas sina Philippine Ambassador to Japan Domingo Siazon at Philippine Commissioner General for World Expo 2005 at Team Japan Head Rosvi C. Gaetos ng Department of Tourism.

 Bilang kinatawan ng Philippine Airlines, isang major sponsor ng World Expo, dumalo sina PAL President Jaime J. Bautista at PAL East Asia Regional Head Genaro Velasquez.

 Mainit na tinanggap nina Chairman Shoichiro Toyoda ng Japan Association for the World Expo 2005 at World Expo Commissioner General and Ambassador Taizo Watanabe ang deligasyon.

 Pinaunlakan rin ng gobernador ng Aichi at Mayor ng Nakano sa Toyokawa City ang okasyon.

 Umaasa si Durano na dahil sa matagumpay na partisipasyon ng Pilipinas sa Expo mas darami pa ang mga Hapong bibisita sa Pilipinas.

27 KATAO, NAMATAY O NAWAWALA SANHI NG TYPHOON NO. 14

 Hindi bababa sa 18 katao ang nakumpirmang patay at 9 ang nawawala noong gabi ng Setyembre 7 matapos tumama ang Typhoon No. 14 sa rehiyon ng Kyushu.

 Nasira nito ang tala ng pinakamalakas na bagyo at nagdulot ng malakas na pagbuhos ng ulan at ihip ng hangin.

 Ayon sa Japan Meteorological Agency, ataya ng ahensiya na aabot sa 250 milimetro ang buhos ng ulan sa Hokkaido at 200 milimetro naman sa rehiyon ng Tohoku.

 Ayon sa ahensiya, noong alas-6 ng gabi ng Setyembre 7, nagtala ang bagyo ng barometric pressure na 985 hectopascals at hangin na may bilis na 90 kph malapit sa sentro.

 Ang mga pagkamatay na dulot ng bagyo ay iniulat sa mga prepektura ng Kagoshima, Miyazaki at Tokushima at ang mga nawawala naman ay huling nakita sa Miyazaki, Oita at Yamaguchi Prefecture.

 Noong umaga ng Setyembre 7, nanumbalik ang operasyon ng halos lahat ng biyahe ng tren na naantala sanhi ng bagyo ngunit ang mga biyahe ng eroplano ay patuloy na naabala dahil sa pagkansela ng ilang biyahe mula sa mga paliparan sa mga rehiyon ng Kyushu, Chugoku at Tohoku.

 Samantala, sinabi ng mga opisyal na ang ika-15 bagyo ay namataan na sa silangang bahagi ng Pilipinas.

OPISYAL NA SASAKYAN NG EMPERADOR AT EMPERATRIS, PAPALITAN NG TOYOTA

 Ang koleksiyon ng magagarang sasakyan na ginagamit ng emperador at emperatris ay madadagdagan ng isang modelo mula sa Toyota Motor Corp. sa piskal na taong 2006 habang ang mga limousine mula sa Nissan Motor Co. na kasalukuyang ginagamit ay unti-unti nang pagpapahingahin.

 Humiling ng pondo ang Imperial Household Agency para mapalitan ng Toyota Century Royal ang 1 sa 5 sasakyan ng emperador at emperatris sa susunod na piskal na taon.

 Papalitan ang Nissan Prince Royal limousine pagkatapos ng 38 pagseserbisyo dahil na rin sa kahilingan ng Nissan na itigil na ang paggamit dito dahil mahirap na umanong panatilihin ang may kalumaan nang modelo ng sasakyan.

 Ang 4 pang natitirang Prince Royal ay papalitan sa loob ng susunod na 3 hanggang 5 taon.

 Ang Toyota Century Royal na may 5 litrong makina at bigat na 2,900 kilo ay nagkakahalaga ng 52.5 milyong yen.

 Bukod sa mahina itong magbuga ng usok, maikukumpara ang laki nito sa Prince Royal at makakapaglulan ng 8 katao.

EMPERADOR AT EMPERATRIS, NAGBIGAY-GALANG SA MGA BIKTIMA NG GIYERA SA SAIPAN

 

 Umalis ng Japan si Emperor Akihito at Empress Michiko noong Hunyo 27 patungong Saipan para sa kanilang kauna-unahang biyahe sa ibang bansa na nakalaan para sa pakikidalamhati sa mga biktima ng World War II.

 Ito ay sa gitna ng mga kamakailang hidwaan sa pagitan ng Japan at mga kalapit-bansa nito sa Asya ukol sa pagkilala ng Japan sa mga isyung kaugnay ng giyera.

 Ang kanilang 2 araw na pagbisita sa West Pacific island ay isinagawa 60 taon matapos ang pagtatapos ng giyera.

 Nag-alay ng isang bouquet ng white chrysanthemums ang Imperial couple sa Monument of the War Dead na itinayo ng pamahalaan ng Japan noong Marso 1974.

 Tumungo sila pagkatapos sa Suicide Cliff at Banzai Cliff kung saan nag-alay sila ng kanilang taimtim na panalangin.

 Mula sa nasabing dalawang bangin, marami umanong mga Hapon at sibilyan ang tumalon at nagpakamatay kaysa sumuko sa mga hukbo ng Estados Unidos.

 Bagamat hindi kabilang sa kanilang public schedule, bumisita rin ang Imperial couple sa mga Tower of Okinawa at Korean Peace Memorial upang magbigay-galang sa mga taga-Korea at Okinawa na namatay sa giyera.

 Pinamahalaan ng Japan ang isla ng higit sa 20 taon sa ilalim ng isang kautusan ng League of Nations hanggang sa pinalitan ito ng Estados Unidos matapos ang paglalaban noong 1944, na tumagal mula Hunyo 15 hanggang Hulyo 9.